मंगलबार २० मंसिर २०७९

काठमाडौँनवरात्रका अवसरमा धेरै मानिस थातथलोमा फर्केर रमाइरहँदा पनि वाग्मती सफाइ अभियानकर्मी भने बिहानैदेखि नदी सफाइमै भटिए ।‘राष्ट्रको लागि हप्ताको दुई घन्टा स्वयम्सेवा’ भन्ने नाराका साथ २०७० जेठ ५ गतेदेखि सुरु भएको सफाइ महाअभियान आजदेखि ४९० औँ हप्तामा प्रवेश गरेको हो । यस अवसरमा बुद्धनगरको वाग्मती पुलमा जम्मा भएका अभियानकर्मीले त्यस क्षेत्रमा सफाइ गरी एक मेट्रिकटन नकुहिने फोहरलाई व्यवस्थापन गरेकोे अभियानकर्मी किशोरसिंह शाहीले राससलाई जानकारी दिनुभयो ।

महाअभियानमा वाग्मती किनार सडकको दुवैतर्फ घरदैलो कार्यक्रमसमेत आयोजना गरिएको थियो । सफाइमा पूर्वमुख्यसचिव एवं प्रमुख सफाइ अभियानकर्मी लीलामणि पौडेल, अधिकार सम्पन्न वाग्मती सभ्यता एकीकृत विकास समितिका अध्यक्ष उद्धवप्रसाद तिमिल्सिना, नवनियुक्त आयोजना प्रमुख सुभाष बस्नेत, काठमाडौँ महानगरपालिका–११ का अध्यक्ष हीरालाल तन्डुकार, अधिकार सम्पन्न वाग्मती समितिका कर्मचारी, वाग्मती फोहर उन्मूलन उपभोक्ता समितिका पदाधिकारी, काठमाडौँ महानगरपालिका वातावरण विभागका पदाधिकारी, स्थानीयवासी एव वाग्मती अभियानकर्मीको सहभागिता थियो ।

सफाइका क्रममा वाग्मती अभियानकर्मी चक्रबहादुर चन्दको जन्मदिनका अवसरमा नदी किनारमा वृक्षरोपण पनि गरिएको थियो । महाअभियानले अर्को शनिबार बुद्धनगर पुलभन्दा पश्चिम झोलुङ्गे पुलअघि संयुक्त राष्ट्रसङ्घीय उद्यानसँगैको भागमा सफाइ गर्ने भएको छ । अर्को शनिबार पनि बडादसैँ नै भए पनि सफाइ अभियान जारी रहने जनाइएको छ ।

विसं २०७० जेठ ५ गतेदेखि वाग्मती सफाइ महाअभियान सुरु भएको हो । त्यसयता वाग्मती सफाइ महाअभियान प्रत्येक हप्ताको शनिबार बिहान दुई घण्टा निरन्तर चलिरहेको छ । जाडो, गर्मी, वर्षा, चाडपर्वलगायत प्रतिकूल अवस्थामा पनि सफाइ महाअभियान रोकिएको छैन । महाअभियानबाट प्रभावित भएर काठमाडौँ उपत्यकाको वाग्मतीका सहायक नदी, सांस्कृतिक सम्पदास्थल, चक्रपथलगायत स्थानमा पनि सफाइ अभियान सुरु गरिएको छ । हाल राजधानीमा २५ भन्दा बढी स्थानमा सफाइ भइरहेको जनाइएको छ ।

यसैगरी काठमाडौँ उपत्यका बाहिरका मुख्य सहर, नदी र सांस्कृतिक सम्पदास्थलमा पनि सफाइ भइरहेको छ । हाल राजधानी बाहिर एक सय नौभन्दा बढी स्थानमा सफाइ भइरहेकोे छ । सफाइ महाअभियान देशव्यापी जागरण फैल्याउन सफल भएको छ ।यसैगरी शनिबार गुह्येश्वरीमाथिको वाग्मतीलगायत वाग्मतीका विभिन्न खण्ड, रुद्रमती, विष्णुमतीका तल्लो र माथिल्लो भाग, मनोहरा, चक्रपथका उत्तरी र पश्चिमी भागमा पनि सफाइ गरिएको जनाइएको छ । ललितपुरको गोदावरी खोला र भक्तपुरको हनुमन्तेमा पनि सफाइ जारी रहेको जनाइएको छ ।

ताप्लेजुङ ।

ताप्लेजुङ महोत्सव म्याराथन प्रतियोगिताअन्तर्गत पुरुषतर्फ दल वहादुर कुँवर प्रथम भएका छन् । जुम्लाको तातोपानी गाउँपालिकाका कुँवरले निर्धारित दूरी ४ घण्टा २ मिनेट २७ सेकेन्डमा पूरा गरेका छन् ।

दोश्रो भएका त्रिभुवन आर्मीका खगेन्द्र बहादुर भाटले मिनेटले ४ घण्टा २ मिनेट ५० सेकेन्डमा पूरा गरे । पाँचथरका मेयाङ्वाले ४ घण्टा २ मिनेट ५१ सेकेन्डमा दूरी पूरा गर्दै तेश्रो स्थान हासिँल गरे ।

महिलातर्फ ताप्लेजुङस्थित मैवाखोला गाउँपालिका फाकुम्बाकी सोमपाल्मु शेर्पा प्रथम भएकी छिन् । शेर्पाले ३ घण्टा ४१ मिनेट ९ सेकेन्डमा पूरा गरेकी हुन् । भोजपुरकी छेम्बीमाया राई दोश्रो भएकी छिन् । मिक्वाखोला गाउँपालिका–३ लिवाङकी पेम्बाल्हामू शेर्पा तेश्रो भएकी छिन् ।

पुरुषतर्फ प्रथम भएका कुँवरले १ लाख ५१ हजार १ सय ११ रुपैयाँ पुरस्कार प्राप्त गरेका छन् । दोश्रो भएका भाटले १ लाख ११ हजार १ सय ११ रुपैयाँ प्राप्त गरेका छन् । तेश्रो स्थान हाँसिल गरेका मेयाङ्बाले ५१ हजार १ सय ११ रुपैयाँ प्राप्त गरेका छन् ।

महिलातर्फ प्रथमले ८१ हजार १ सय ११ रुपैयाँ,दोश्रोले ५१ हजार १ सय ११ रुपैयाँ र तृतीयले ३१ हजार १ सय ३१ रुपैयाँ प्राप्त गरेका छन् । उत्कृष्ट दशभित्र परेका महिला र पुरुष दुवै तर्फका खेलाडीलाई जनही पाँच हजारका दरले पुरस्कार प्राप्त गरेका छन् ।

सदरमुकामस्थित पाथीभरा चोकदेखि सुकेटार–काफ्लेपार्टीहुँदै पाथीभरा मन्दिरसम्मको दुरी कायम गरिएको थियो । जिल्लाको पर्यटकीय स्थलको प्रचारप्रसार गर्ने उदेश्यले महोत्सव आयोजना गरिएको आयोजक पाथीभरा देवी मन्दिर क्षेत्र संरक्षण तथा सम्बद्र्धन समितिका अध्यक्ष तारानाथ घिमिरेले बताए ।

पाथीभरा क्षेत्र विकास समिति र भिमकाली गुल्मको आयोजनामा असोज ११ गतेदेखि ३ दिनसम्म महोत्सव सञ्चालन भएको हो ।

प्रतिक्रिया दिनुहोस्


Last Updated on: October 1st, 2022 at 4:15 pm
९५ पटक हेरिएको

तपाईको प्रतिक्रिया