काठमाडौं । सामाजिक सञ्जालमा एक व्यक्तिको भिडियो भाइरल भइरहेको छ । यस भिडियोमा उनले भ्यालेन्टाइन डेमा आफ्नी प्रेमिकालाई प्रपोज गर्न १४ सय किलोमिटर यात्रा गरिरहेको दाबी गरेका छन् ।
उनले प्रेमिकालाई ५ महिनाअघि मात्र टिकटकमा भेटेका थिए । उनको यात्रा जनवरी १४ बाट सुरु भएको हो । उनले आफ्नो यात्राको अपडेट सामाजिक संजालमा प्रयोगकर्तासँग निरन्तर शेयर गरिरहेका छन् ।
थाइगरको रिपोर्ट अनुसार ती व्यक्ति थाइल्याण्डका बासिन्दा हुन्। उनी नाखोन नयोक प्रान्तस्थित आफ्नो घरबाट सातुन प्रान्त जाँदैछन् । उनकी प्रेमिका त्यहीँ बस्छिन् । उनीहरुबीच भेट नभएपनि भिडियो कलमा कुरा भइरहन्छ ।
भिडियोमा ती व्यक्तिले १४-१५ फेब्रुअरीसम्ममा आफ्नी प्रेमिकाको घर पुग्ने प्रयास गरिरहेको बताएका छन् । यसका लागि उनले करिब १४ सय किलोमिटर यात्रा गर्नेछन् । प्रेमिकाले उनलाई सातुनसम्म हिड्न वा दौडन चुनौती दिइन् । उसले आफ्नो प्रेम प्रमाणित गर्न यस्तो गरेका हुन् ।
टिकटकमा पोस्ट गरिएको भिडियोमा उनले भने- मैले उनलाई पाँच महिनाअघि टिकटकमा भेटेको थिएँ। हामी वास्तविक जीवनमा कहिल्यै भेटेका छैनौं तर भिडियो कल मार्फत नियमित कुराकानी गर्छौं। भर्खरै मेरी प्रेमिकाले मलाई सतुनसम्म हिड्ने वा दौडने र मेरो प्रेम प्रमाणित गर्ने चुनौती दिएकी छिन्। मैले यो चुनौती स्वीकार गरें र उनको घरतिर लागें। उक्त व्यक्तिले भिडियोको क्याप्सनमा लेखेका छन्- ‘साँचो प्रेम प्रमाणित गर्न दौडनुहोस्।’
यात्रा सुरु गर्नुअघि ती व्यक्तिले अर्को भिडियोमा भने- म साँचो माया छ कि छैन भनेर प्रमाणित गर्न दौडनेछु। म एक महिना दौडन्छु। १४ जनवरी बाट सुरु गरेर भ्यालेन्टाइन डे को दिन १४ फेब्रुअरीमा गन्तव्य पुग्नेछ। म प्रमाणित गर्नेछु कि साँचो प्रेम सामाजिक सञ्जालमा पाउन सकिन्छ।
ती व्यक्तिले आफ्नो टिकटक खातामा आफ्नो यात्राको बारेमा नियमित अपडेटहरू पोस्ट गर्दै आएका छन्। तर, उनले आफ्नो नाम र प्रेमिकाको बारेमा भने केही बताएका छैनन् । तर थाई सामाजिक सञ्जालमा यसको चर्चा भइरहेको छ । प्रेममा डुबेका यी व्यक्तिका सामाजिक सञ्जालमा फलोअर्सको संख्या लगातार बढिरहेको छ । धेरै थाई टिकटकरहरूले उनलाई प्रोत्साहन गर्न उनको भिडियोमा टिप्पणी गरिरहेका छन्। कतिपयले उनलाई भेटेर सेल्फी खिचिरहेका छन् ।
उनले आफ्नो यात्राको लागि राम्रो तयारी गरेका थिए। उनले ज्याकेट, टोपी, सनग्लास, बाल्टिन आदि बोकेका छन् । उनको झोलामा थाई राष्ट्रिय झण्डा पनि छ । भिडियोमा एक व्यक्ति भन्छन्– म हिँड्दा निकै थकित छु । मांसपेशी दुख्ने। अब उनले झन्डै ८५० किलोमिटर यात्रा गर्नुपर्नेछ ।
प्रतिक्रिया
महेन्द्रनगर (दोधारा चाँदनी) –
कञ्चनपुरको महाकाली नदी बगरमा किसन सोनाहको परिवार वालुवा छान्न र गिट्टी कुट्नमा व्यस्त छ । छेउमा साढे दुई वर्षको नाति रोइरहेको छ तर यो परिवार भने बच्चाको रुवाईलाई खासै वास्ता नगरी काम सकाउन तल्लिन छ ।
भीमदत्त नगरपालिका-१२ ऐरीका ४५ वर्षीय किसन सोनाहको परिवारले प्रत्येक वर्ष नौ महिना यसैगरी बगरमा बिताउँछ । परिवारको खर्च जुटाउनका लागि आफूहरुसँग यसको विकल्प नभएको किसन सोनाहको भनाइ छ । भीमदत्त नगरपालिका वडा नं १२ र १३ मा लामो समयदेखि बसोबास रहेका अल्पसङ्ख्यक सोहान जातिको आयस्रोतको मुख्य आधार नै महाकालीको बगर बनेको छ ।
“बर्दियातिर हाम्रो समूदायका मानिसले सुन छान्ने काम गर्छन्”, उहाँले भन्नुभयो, “तर यहाँ सुन भेटिदैन र बालुवा छान्ने र गिट्टी कुट्नुको विकल्प छैन ।” आफूसहित श्रीमती, छोरा, बुहारी सबैजना गिट्टी कुट्नमा व्यस्त यो परिवारका लागि साढे दुई दशकदेखि महाकालीको बगर आम्दानीको स्रोत बनेको छ । यो परिवारले यसरी हरेक दिन खटिँदा मासिक रु २५ हजारसम्म कमाउने लक्ष्मी सोनाहले बताउनुभयो ।
“चामल किन्नेदेखि बिरामी हुँदा ओखती किन्नका लागि समेत यो परिवारले यही बगरमा दैनिक कडा परिश्रम गर्दै आएको छ”, लक्ष्मी सोनाहले रासससँग भन्नुभयो, “दिनभरको कमाइ नगरे साँझ विहान घरमा चुल्हो बल्दैन ।” चुनावको समयमा भोट माग्न आउने राजनीतिक दलका नेताहरुले समूदायको हितमा काम गर्ने भन्दै कैयन आश्वासन दिए पनि चुनाव जितेपछि भने बिर्सिने गरेको उहाँको गुनासो छ ।
त्यसैगरी पाँच वर्ष भारतको महाराष्ट्र र गुजरातमा मजदुरी गरेर स्वदेश फर्किनुभएका अशोक सोनाह पनि बगरमै मजदुरी गर्न व्यस्त हुनुहुन्छ । प्रत्येक वर्ष असोजदेखि जेठसम्म यो समूदायका अधिकांश सदस्यले बगरमै पसिना बगाउने उहाँको भनाइ छ ।
“हाम्रो तीन पुस्ता अहिले यही बगरमा व्यस्त छ”, उहाँले भन्नुभयो, “सरकारले हाम्रो जस्तो समूदायका व्यक्तिलाई सीप सिकाएर रोजगारी दिएको भए राम्रो हुन्थ्यो ।” अशोकले हजुरबुवादेखि आफूसम्म यही बगरमा काम गरिरहेको बताउनुभयो ।
अहिले महाकालीमा प्रतिट्रली बालुवा रु एक हजार र गिट्टी रु एक हजार आठ सयमा बिक्री हुन्छ । “पूरै परिवारले चार दिनमा एक ट्रली गिट्टी छान्न सक्छौँ”, उहाँले भन्नुभयो, “पहिले भुजेलातिर सङ्कलन गथ्र्यौ अहिले झोलुङ्गे पुल क्षेत्रतर्फ सरेका छौँ ।”
ओदालीका ५५ वर्षे चन्द्रकला सोनाह पनि बुहारी सुनितासँगै बगरमा गिट्टी कुट्न व्यस्त हुनुहुन्छ । “हाम्रो परिवारको दैनिकी त यही बगरका ढुङ्गासँग लड्नु हो”, सुनिताले भन्नुभयो, “बगरमा दिनभर काम गर्न पाइयो भने घरमा चुल्हो बल्छ ।”
दुई नातिलाई स्कूल पठाएर आफूहरु बगरमा आएको चन्द्रकला सोनाहले बताउनुभयो । “छोरो काम गर्न कतार गएको छ”, उहाँले भन्नुभयो, “खेतिपाती गर्न खेत नभएपछि बुहारी र म बगरमै काम गर्न आउँछौँ ।” उहाँले नौ महिना बगरमा पसिना बगाएपछि बाँकी समय गाउँघरमा मजदुरी गर्दै आएको बताउनुभयो ।
“केही वर्ष गाउँघरमा घर बनाउनेदेखि अरु काममा ज्याला मजदुरीसमेत गरेँ”, सुनिताले भन्नुभयो, “गाउँमा काम गरेको पैसासमेत समयमा नपाउने भएपछि फेरि बगरमै आए ।”
उहाँले केही समयअघि बाख्रापालन, कुखुरापालन तालिम सञ्चालनका लागि समूदायले पहल गरे पनि सरोकारवाला निकायबाट कुनै सुनुवाइ नभएको गुनासो गर्नुभयो । “गाउँमा सिलाइकटाइको सीप सिकेर काम गरौँ भन्दा पनि पाइन, त्यसैले बगरमै काम गर्नु परेको छ”, उहाँले भन्नुभयो ।
बगरमा हाल सोनाह समूदायको करिब ४० परिवार बालुवा छान्ने र गिट्टी कुट्ने काम गरिरहेको छ । महाकाली नदीको भुजेला क्षेत्रदेखि दोधारा चाँदनी झोलुङ्गे पुलसम्म तीन सयभन्दाबढी विपन्न परिवार अहिले बालुवा र गिट्टी छानिरहेको छ ।
यहाँका अधिकांश सोनाह जातिसँग खेतीयोग्य जमिन छैन भने यो समूदायका धेरै परिवार ऐलानी र नदी किनारका खाली जमिनमा टहरा बनाएर बसिरहेका छन् ।
सोनाह जाति पुस्ताँैदेखि यहाँ मजदुरी गरिरहेको भए पनि करिब एक÷डेढ दशकयता दलित, विपन्न र चौधरी समूदाय पनि बगरमै टहरा बनाएर मजदुरीमा गर्छन् । बगरमा आश्रय लिएर बालुवा, गिट्टी छानिरहेका कञ्चनपुरको बेलौरी नगरपालिका–८ कलकत्ताको जुगमनि चौधरीको दम्पती पनि यहीँ काम गरिरहेको छ ।
“बगरमा सङ्कलन खुलेकाबेला काम गर्न आउन थालेको आठ वर्ष भयो”, चौधरीले भन्नुभयो, “वृद्धावस्था हुँदा भारत गएर काम गर्न सकेनौँ र यही काम गरेर परिवारको खर्च चलाइरहेका छौँ ।”
यहाँको बेलौरी, बेल्डाँडी क्षेत्रका व्यक्तिहरु पनि बगरमै टहरा बनाएर काम गरिरहेका छन् । महाकाली वरपरको तटीय क्षेत्रका दलित एवं विपन्न समूदायका अधिकांश परिवार अहिले बगरमै सङ्घर्ष गरिरहेका छन् ।
यहाँ हरेक वर्ष भीमदत्त नगरपालिकाले नदीजन्य पदार्थ सङ्कलनका लागि ठेक्का दिँदै आएको छ । उक्त रोयल्टीवापतको रकम भीमदत्त र दोधाराचाँदनी नगरपालिकाले बाँडफाँट गर्दै आएका छन् ।
भीमदत्त नगरपालिका वडा नं १३ का अध्यक्ष रामबहादुर बोहराले लामो समयदेखि स्थानीय र जिल्ला बाहिरबाट समेत बगरमा बालुवा, गिट्टी जानेर जीविकोपार्जन गर्ने नागरिक धेरै रहेको बताउनुभयो । “कैलालीको टीकापुरदेखि बेलौरी, बेल्डाँडीबाट गिट्टी छान्न आउनेहरु रातभर बगरमै सुत्छन्”, अध्यक्ष बोहराले भन्नुभयो, “तटीय क्षेत्रका स्थानीय भने दिनभर बगरमा काम गरेर बेलुकी घर फर्कन्छन् ।”
