भोटेकोशी बाढीपीडित सहयोग: निसर्ग हस्पिटलको ११ लाख सहयोग

१२ भदौ, काठमाडौं ।

भोटेकोशी बाढीपीडित सहयोगका लागि कैलालीको धनगढीस्थित निसर्ग हस्पिटल एण्ड रिसर्च सेन्टरले ११ लाख ११ हजार १ सय ११ रुपैयाँ आर्थिक सहयोग उपलब्ध गराएको छ। भीषण बाढी र पहिरोका कारण सिन्धुपाल्चोकको भोटेकोशी तटीय क्षेत्रमा ठूलो जनधनको क्षति भएपछि पीडित परिवारको राहत तथा पुनर्स्थापनाका लागि अस्पताल प्रशासनले उक्त रकम सहयोग गर्ने निर्णय गरेको हो। देश नै प्राकृतिक विपद्को कठिन परिस्थितिबाट गुज्रिरहेका बेला अस्पतालले सामाजिक उत्तरदायित्व वहन गर्दै यो कदम चालेको जनाएको छ।

अस्पताल व्यवस्थापनका अनुसार हरेक वर्ष भब्य रूपमा आयोजना गरिँदै आएको वार्षिक तीज विशेष सांस्कृतिक कार्यक्रमलाई यस वर्ष पूर्ण रूपमा स्थगित गरिएको छ। बाढीका कारण कैयौँ नागरिकले ज्यान गुमाउनुका साथै सयौँ परिवार विस्थापित भई पीडामा रहेका बेला उत्सव मनाउनु उपयुक्त नहुने निष्कर्ष अस्पतालले निकालेको हो। तीज कार्यक्रमका लागि तय गरिएको बजेटलाई नै कट्टा गरी बाढीपीडितको उद्धार, राहत तथा पुनर्स्थापना कोषमा समर्पण गरिएको अस्पताल प्रशासनले जानकारी दिएको छ।

भोटेकोशी नदीमा आएको भीषण अविरल बाढीले तटीय क्षेत्रका भौतिक संरचना, निजी आवास तथा खेतीयोग्य जमिनमा व्यापक क्षति पुर्‍याएको छ। विपद्पछि स्थानीय तह तथा विभिन्न संघसंस्थाहरू राहत कार्यमा जुटे पनि प्रभावितहरूका लागि खाद्यान्न, सुरक्षित आवास र स्वास्थ्य सेवाको आवश्यकता अझै उत्तिकै खड्किएको छ। यस्तो संवेदनशील समयमा निजी क्षेत्रबाट प्राप्त भएको यो ठूलो धनराशिको सहयोगले राहत वितरण कार्यलाई थप प्रभावकारी बनाउन मद्दत पुग्ने विश्वास लिइएको छ।

सुदूरपश्चिम क्षेत्रमा गुणस्तरीय स्वास्थ्य सेवा प्रदान गर्दै आएको निसर्ग हस्पिटलले यसअघि पनि विभिन्न सामाजिक तथा मानवीय सेवाका कार्यहरूमा अग्रसरता देखाउँदै आएको थियो। हस्पिटल सञ्चालक समितिले राष्ट्रिय विपद्को समयमा देशका जुनसुकै भूभागका नागरिकलाई सहयोग गर्नु सबैको साझा कर्तव्य भएको बताउँदै अन्य संघसंस्था तथा उद्योगी व्यवसायीहरूलाई पनि सहयोगका लागि अगाडि बढ्न आह्वान गरेको छ।

बाढी र पहिरोपछि सिर्जित जटिल अवस्थालाई सामान्यीकरण गर्न सरकारी तथा गैरसरकारी निकायहरूबाट दीर्घकालीन पुनर्स्थापनाका योजनाहरू बनाइनु आवश्यक देखिएको छ। निसर्ग हस्पिटलले देखाएको यो मानवीय दायित्व र सामाजिक सद्भावको कदमले विपद्मा परेका भोटेकोशीका बासिन्दाहरूलाई राहत पुग्नुका साथै अन्य संस्थाहरूका लागि पनि प्रेरक दृष्टान्त बनेको छ।