१९ चैत, काठमाडौं । प्रत्येक वर्ष चैत्र शुक्ल पूर्णिमाका दिन मनाइने हनुमान जन्मजयन्ती आज देशभर विभिन्न धार्मिक कार्यक्रमका साथ श्रद्धापूर्वक मनाइँदै छ। यस अवसरमा भक्तजनहरूले हनुमान को पूजा–आराधना गर्दै बल, बुद्धि र विद्या प्राप्त हुने तथा दुःख र सङ्कटबाट मुक्ति पाइने विश्वास गरेका छन्। आज विशेषगरी हनुमानढोका दरबार, पशुपतिनाथ मन्दिर परिसरस्थित हनुमान मन्दिर तथा गोकर्णेश्वर नगरपालिका का पञ्चमुखी हनुमानलगायत देशभरका मन्दिरहरूमा विशेष पूजाआराधना भइरहेको छ।
हनुमानलाई रामभक्त, शक्ति र साहसको प्रतीकका रूपमा पूजा गर्ने परम्परा छ। धार्मिक विश्वासअनुसार हनुमानको आराधनाले भय, रोगव्याधि र विभिन्न नकारात्मक शक्तिबाट रक्षा हुने मान्यता रहेको छ। विशेषगरी “संकटमोचन”का रूपमा हनुमानको पूजा गर्ने प्रचलन पुरानै कालदेखि चलिआएको छ। धार्मिक ग्रन्थहरूमा हनुमानलाई वायुका पुत्र, अपार शक्ति र रूप परिवर्तन गर्न सक्ने दिव्य शक्तियुक्त देवताको रूपमा वर्णन गरिएको छ। रामायण मा हनुमानको भूमिका अत्यन्त महत्वपूर्ण मानिन्छ, जहाँ उनले भगवान् रामप्रति अटल भक्ति र समर्पण देखाएका छन्।
आज मन्दिरहरूमा विशेष पूजाआराधना ! हनुमान जन्मजयन्ती मनाइँदै,
यस दिन भक्तजनहरूले व्रत बस्ने, पवित्र नदीमा स्नान गर्ने, हनुमान चालिसा पाठ गर्ने तथा मन्दिरमा सिन्दूर चढाउने परम्परा पनि निर्वाह गर्छन्। देशका विभिन्न स्थानमा शोभायात्रा निकाल्ने र धार्मिक सभा आयोजना गर्ने गरिएको छ। धार्मिक विद्वानहरूका अनुसार हनुमानको आराधनाले मानसिक शान्ति, आत्मबल र सकारात्मक ऊर्जा प्राप्त हुने विश्वास रहँदै आएको छ।
