२०८२ चैत ११ गते | काठमाडौँ — पाँचथर र ताप्लेजुङमा निर्माणाधीन दुईवटा पुल बाढीले क्षतिग्रस्त भएका छन्। पाँचथरको याङ्बरक गाउँपालिका–२ स्थित मेवाखोलामा र ताप्लेजुङको नेरुवा खोलामा बनिरहेका पुल गएराति आएको बाढीले भत्काएको हो।
प्राविधिकहरूको अनुसार, बाढीले खोलाको सतह गहिरो बनाएर टेका र फर्मा ढलाएपछि पुल भत्किएको हो। पाँचथरको मेवाखोलामा ४० मिटर लामो पुल निर्माणाधीन थियो। दुई वर्षअघि पुरानो पुल बगाएपछि प्रदेश पूर्वाधार कार्यालयले नयाँ पुल निर्माण अघि बढाएको थियो।
मध्यपहाडी लोकमार्ग फिदिम आयोजना कार्यालयका प्रमुख सञ्जय मिश्रले बताएअनुसार, मेवाखोलामा ९० प्रतिशत काम सकिएको पुल नै बाढीले भत्काएको हो। ७ करोड ७६ लाख रुपैयाँको ठेक्का सञ्जय निर्माण सेवाले पाएको थियो। ‘चैत–२ गते ढलान सम्पन्न भएको थियो, प्राकृतिक प्रकोपले पुल भत्काइदियो,’ उनले भने। पुल नहुँदा उत्तरी च्याङ्थापु र फलैचाबासीका स्थानीय कठिनाइमा परेका छन्।
त्यसैगरी, ताप्लेजुङको नेरुवा खोलामा ३५ मिटर लामो पुल पनि भत्केको छ। पूर्वाधार कार्यालय ताप्लेजुङका प्रमुख कुमार कर्णका अनुसार, काम अन्तिम चरणमा पुगेको पुलमा राति आएको बाढीले सपोर्टलाई क्षति पुर्याएर भत्काएको हो।
उनले भने, ‘ढलानको २८ दिनपछि रड तन्काउनु पर्ने हुन्छ, तर बाढीले पहिले नै पुल भत्काइदियो। नत्र केही हप्ता पछि गाडी चलाउन सकिने थियो।’ यहाँ पुल निर्माणको ठेक्का ७ करोड ४७ लाख रुपैयाँमा सञ्जिव निर्माण सेवाले पाएको थियो।