भोटेकोशी बाढी: अस्ट्रेलियाकी विदेशमन्त्री वोङद्वारा शोक व्यक्त

२३ भदौ, काठमाडौं ।

काठमाडौं। भोटेकोशी बाढीका कारण नेपालमा भएको ठूलो मानवीय तथा भौतिक क्षतिप्रति अस्ट्रेलिया सरकारले गहिरो दुःख व्यक्त गरेको छ। अस्ट्रेलियाकी विदेशमन्त्री पेनी वोङले राजधानी क्यानबेरास्थित नेपाली राजदूतावास पुगेर शोक पुस्तिकामा हस्ताक्षर गर्दै विपद्को यस कठिन घडीमा अस्ट्रेलियाली सरकार र जनता नेपालीहरूको साथमा रहेको प्रतिबद्धता जनाएकी छन्।

विदेशमन्त्री वोङले सामाजिक सञ्जालमार्फत जानकारी गराउँदै नेपालमा आएको विनाशकारी बाढी र पहिरोले पुर्‍याएको अपूरणीय क्षतिप्रति स्तब्ध भएको उल्लेख गरेकी छन्। शोक पुस्तिकामा हस्ताक्षर गरेपछि उनले अस्ट्रेलिया र नेपालबीचको लामो समयदेखिको मैत्रीपूर्ण सम्बन्धको स्मरण गर्दै संकटको समयमा हरसम्भव सहयोग गर्न अस्ट्रेलिया तयार रहेको स्पष्ट पारेकी छन्।

क्यानबेरास्थित नेपाली राजदूतावासका अनुसार विदेशमन्त्री वोङको दूतावास आगमनले दुई देशबीचको कूटनीतिक र भावनात्मक सम्बन्धलाई अझ प्रगाढ बनाएको छ। दूतावासका प्रतिनिधिहरूसँगको भेटमा उनले भोटेकोशी बाढी प्रभावित क्षेत्रमा भइरहेको उद्धार तथा राहत कार्यका बारेमा चासो व्यक्त गर्नुका साथै विपद्मा परेका अस्ट्रेलियाली नागरिकहरूको स्थिति र उनीहरूको उद्धारमा नेपाल सरकारले देखाएको तत्परताका लागि धन्यवाद समेत ज्ञापन गरेकी थिइन्।

नेपालको सिन्धुपाल्चोक र आसपासका क्षेत्रमा भोटेकोशी नदीमा आएको भीषण बाढीका कारण ठूलो संख्यामा सर्वसाधारणले ज्यान गुमाउनुका साथै ठूलो मात्रामा पूर्वाधार र निजी सम्पत्तिको क्षति भएको छ। बाढी प्रभावित क्षेत्रमा हाल सुरक्षा निकाय तथा स्थानीय समुदायको सहभागितामा तीव्र रूपमा राहत तथा उद्धार कार्य सञ्चालन भइरहेको छ।

नेपालमा आएको प्राकृतिक विपद्पछि अन्तर्राष्ट्रिय समुदायले पनि गहिरो सहानुभूति प्रकट गर्दै सहयोगको हात बढाउन थालेका छन्। अस्ट्रेलिया सरकारले नेपाललाई संकटको समयमा मानवीय सहायता तथा पुनर्निर्माणका क्षेत्रमा सहकार्य गर्ने संकेत गरेको छ।

प्राकृतिक विपद्को सामना गरिरहेको नेपालका लागि अस्ट्रेलिया जस्ता मित्रराष्ट्रहरूबाट प्राप्त उच्चस्तरीय सहानुभूति र प्रतिबद्धताले राहत तथा पुनर्स्थापना कार्यमा थप उर्जा प्रदान गरेको छ। दुई देशबीचको बहुआयामिक सम्बन्धलाई यस्ता कठिन समयमा देखाइने आपसी सद्भावले अझ मजबुत बनाउने विश्वास लिइएको छ।