२३ जेठ, काठमाडौं । ट्राफिक नियम उल्लङ्घन गर्ने सवारी चालकहरूका लागि अब सचेतना कक्षा लिन भौतिक रूपमा ट्राफिक कार्यालय धाउनुपर्ने बाध्यता हटेको छ। नागरिक एपमार्फत उपलब्ध नयाँ अनलाइन प्रणालीले चालकहरूलाई आफ्नै सुविधाअनुसार २४सै घण्टा सचेतना कक्षा लिन सक्ने व्यवस्था गरेको छ।
काठमाडौं उपत्यका ट्राफिक प्रहरी कार्यालयका अनुसार मादक पदार्थ सेवन (मापसे), लेन अनुशासन उल्लङ्घन, रातो बत्तीमा नरोक्ने तथा तीव्र गतिमा सवारी चलाउने चालकहरूले अब नागरिक एपमार्फत अनलाइन कक्षा पूरा गर्न सक्नेछन्।
एआईले गर्छ निरन्तर निगरानी
यो प्रणालीमा आर्टिफिसियल इन्टेलिजेन्स (एआई) प्रविधि प्रयोग गरिएको छ, जसले कक्षा अवधिभर चालकको गतिविधि निगरानी गर्छ। चालकले क्यामेरा बन्द गर्ने, अनुहार हटाउने वा अन्य व्यक्तिसँग कुरा गर्ने प्रयास गरेमा एआईले चेतावनी दिन्छ।
लगातार नियम उल्लङ्घन भएमा प्रणालीले चालकलाई कक्षाबाट बाहिर निकाल्छ। पहिलो पटक असफल हुनेलाई १२ घण्टापछि पुनः प्रयास गर्न दिइन्छ भने दोस्रो पटक पनि असफल भएमा अनलाइन सुविधा बन्द भएर भौतिक कक्षा लिनुपर्ने हुन्छ।
यसरी सुरु हुन्छ अनलाइन कक्षा
अनलाइन कक्षा लिनुअघि चालकले नागरिक एपमार्फत तोकिएको जरिवाना भुक्तानी गर्नुपर्छ। भुक्तानी सफल भएपछि एपमा ‘Take Online Class’ विकल्प देखिन्छ।
कक्षा सुरु गर्न चालकले आफ्नो अनुहार स्पष्ट देखिने गरी लाइभ फोटो खिच्नुपर्छ। प्रणालीले उक्त फोटो नागरिक एपको केवाईसी विवरणसँग तुलना गर्छ। अनुहार पर्याप्त रूपमा मिलेको पुष्टि भएपछि मात्रै कक्षा सुरु हुन्छ।
प्रकाशको कमी, क्यामेरा समस्या वा अनुहार स्पष्ट नदेखिएमा प्रणालीले कक्षा सञ्चालन गर्न अनुमति दिँदैन।
३६ मिनेटको भिडियो कक्षा
कक्षा करिब ३६ मिनेट लामो हुन्छ। यस अवधिभर एआईले चालकको उपस्थिति र व्यवहार निगरानी गरिरहन्छ।
यदि चालकले लामो समयसम्म क्यामेराबाट अनुहार हटाएमा वा ध्यान अन्यत्र मोडेमा एआईले चेतावनी दिन्छ। पटक-पटक नियम उल्लङ्घन गरेमा कक्षा स्वतः बन्द हुन्छ।
उत्तीर्ण हुन कम्तीमा तीन सही उत्तर आवश्यक
भिडियो कक्षा समाप्त भएपछि चालकलाई कक्षासँग सम्बन्धित ६ वटा प्रश्न सोधिन्छ। कक्षा सफलतापूर्वक पूरा गर्न कम्तीमा तीन प्रश्नको सही उत्तर दिन आवश्यक हुन्छ।
उत्तीर्ण भएपछि ट्राफिक प्रहरीको TVRS प्रणालीमा सम्बन्धित चिट स्वतः क्लियर हुन्छ। यदि प्रश्नहरूको सही उत्तर दिन नसकेमा वा पटक-पटक नियम उल्लङ्घन भएमा चालकलाई भौतिक रूपमा उपस्थित भएर कक्षा लिनुपर्ने व्यवस्था गरिएको छ।
९० प्रतिशत चालकले प्रयोग गरिरहेका छन् सेवा
ट्राफिक प्रहरीका अनुसार २९ असार २०८२ देखि सुरु गरिएको यो सेवाको प्रयोग तीव्र रूपमा बढिरहेको छ। हाल ट्राफिक नियम उल्लङ्घन गर्ने करिब ९० प्रतिशत चालकहरूले नागरिक एपमार्फत अनलाइन सचेतना कक्षा लिने गरेका छन्।
प्रहरीका अनुसार यो नेपाल सरकारका निकायहरूमा लागू गरिएको पहिलो पूर्ण एआई-आधारित स्वचालित निगरानी प्रणालीमध्ये एक हो, जसले सेवा प्रवाहलाई थप सहज, पारदर्शी र प्रभावकारी बनाएको छ।
यो पनि पढ्नुहोस:विश्व वातावरण दिवस २०२६ देशभर विभिन्न कार्यक्रमसहित मनाइँदै, कोरला नाकाबाट भित्रिएका ७५० विद्युतीय गाडी नियन्त्रणमा, सांसदलाई ४ अर्ब ३२ करोड बजेट बाँड्दै बागमती सरकार, प्रत्यक्ष सांसदलाई ५ करोडसम्म, सरकारले २५ संस्था खारेज , बैंकमा निष्क्रिय रहेको कोषको रकम सरकारले चलाउने, हकवालाले दाबी गरे फिर्ता हुने, पर्यटन प्रवर्धन र आगन्तुकहरुको लागि Tarevir.com को सुरुवात
Leave a Reply