रसुवा बाढी : ८२६ जना सम्पर्कविहीन, उद्धार प्रयास जारी

११ भदौ, काठमाडौं ।

रसुवा बाढीका कारण भोटेकोशी नदी क्षेत्रमा ठूलो जनधनको क्षति पुगेको छ भने हालसम्म कम्तीमा ८२६ जना नागरिक सम्पर्कविहीन भएका छन्। बुधबार बिहान भोटेकोशी नदीमा अचानक आएको भीषण बाढी र पहिरोका कारण नदी तटीय क्षेत्र तथा जलविद्युत् आयोजनाहरूमा कार्यरत सर्वसाधारण, प्राविधिक तथा निजामती कर्मचारीहरू सम्पर्कविहीन बनेका हुन्। निरन्तरको वर्षा र प्रतिकूल मौसमका कारण बाढी प्रभावित क्षेत्रमा टेलिफोन सेवा र सडक सञ्जाल पूर्ण रूपमा अवरुद्ध हुँदा खोजी कार्यमा थप जटिलता उत्पन्न भएको छ।

बाढीका कारण मधेश प्रदेशका विभिन्न जिल्लाबाट रसुवा पुगेका कामदार तथा प्राविधिकहरू ठूलो संख्यामा सम्पर्कविहीन भएका छन्। प्राप्त पछिल्लो विवरण अनुसार मधेश प्रदेशका ३० जना नागरिक हालसम्म परिवार र प्रशासनको सम्पर्कमा आएका छैनन्। प्रहरीका अनुसार पर्सा जिल्लाका १६ जना, सर्लाहीका ६ जना, बाराका ३ जना, रौतहटका २ जना र सप्तरीका २ जना सम्पर्कविहीन छन्। उनीहरू मुख्यगरी रसुवाका निर्माणाधीन आयोजना र स्थानीय व्यापार व्यवसायमा संलग्न रहँदै आएका थिए।

त्यसैगरी सिरहा जिल्ला घर भई रसुवामा कार्यरत रहेका ६ जना नागरिक पनि बाढीपछि बेपत्ता भएका छन्। गोलबजार, कल्याणपुर, सुखीपुर र लहान नगरपालिकाका बासिन्दा रहेका ती व्यक्तिहरूमा इन्जिनियर मुकेश कुमारसहित स्थानीय प्राविधिक तथा निर्माण श्रमिकहरू रहेका छन्। भोटेकोशीको बाढीले जलविद्युत् गृह र आवासीय क्याम्पहरूमा क्षति पुर्याएपछि उनीहरूको स्थिति अज्ञात रहेको स्थानीय जनप्रतिनिधि तथा प्रहरीले जनाएका छन्।

यसैबीच देशको सुदूरपश्चिम क्षेत्र कञ्चनपुरबाट रसुवा पुगेका २४ जना नागरिक पनि बाढीपछि सम्पर्कविहीन बनेका छन्। जिल्ला प्रहरी कार्यालय कञ्चनपुरका अनुसार सम्पर्कविहीन हुनेहरूमा सरकारी कर्मचारी तथा विकास आयोजनामा खटिएका कामदारहरू रहेका छन्। कञ्चनपुर प्रशासनले बाढी प्रभावित क्षेत्रको वस्तुस्थितिबारे जानकारी लिन र आफ्ना नागरिकको सकुशल उद्धारका लागि रसुवा जिल्ला प्रशासन तथा केन्द्रीय सुरक्षा निकायहरूसँग निरन्तर समन्वय गरिरहेको बताएको छ।

भौगोलिक विकटता र बाढीले सडक मार्गहरू अवरुद्ध पारेका कारण उद्धार टोलीहरूलाई प्रभावित स्थलसम्म पुग्न कठिन भइरहेको छ। नेपाल प्रहरी, सशस्त्र प्रहरी बल र नेपाली सेनाको संयुक्त टोली परिचालन गरी उद्धार प्रयास भइरहेको भए पनि प्रतिकूल मौसमका कारण हवाई उद्धारमा समेत समस्या आएको छ। गृह मन्त्रालयले प्रभावित क्षेत्रमा आपत्कालीन सहायता पुर्याउन र बेपत्ता नागरिकहरूको खोजी कार्यलाई पहिलो प्राथमिकतामा राखेर काम गर्न सुरक्षा निकायहरूलाई निर्देशन दिएको छ।