पृथ्वी राजमार्ग अवरुद्ध: घोप्टेभिरमा सुक्खा पहिरो

२३ कात्तिक, काठमाडौं ।

चितवन: पृथ्वी राजमार्गअन्तर्गत चितवनको इच्छाकामना गाउँपालिका–४ स्थित घोप्टेभिरमा सुक्खा पहिरो खस्दा राजमार्ग दुईतर्फी रूपमा पूर्ण अवरुद्ध बनेको छ। बिहीबार बिहान करिब ५ बजेको समयमा सडकमाथिबाट चट्टानसहितको ठूलो सुक्खा पहिरो खसेपछि राजधानी काठमाडौंसँग जोड्ने प्रमुख सडक सम्पर्क विच्छेद भएको हो। पहिरोका कारण सडकमा दुवैतर्फ सयौँको संख्यामा सवारी साधनहरू रोकिएका छन्।

इलाका प्रहरी कार्यालय मुग्लिन र जिल्ला प्रहरी कार्यालय चितवनका अनुसार डाँडाबाट निरन्तर खसेको लेदो र ठूला ढुङ्गाका कारण राजमार्ग पूर्ण रूपमा ठप्प बनेको हो। वर्षा नभएको अवस्थामा पनि एकाएक खसेको सुक्खा पहिरोले सडक ढाकेकाले यात्रुहरू अलपत्र परेका छन्। सडक खुलाउनका लागि बिहानैदेखि सुरक्षा निकाय र सडक विभागको टोली परिचालन गरिएको छ।

प्रहरीका अनुसार पहिरो पन्छाउनका लागि दुईवटा ठूला एक्साभेटर र लोडरको प्रयोग भइरहेको छ। तर, सडकमा खसेको पहिरोको परिमाण ठूलो भएकाले राजमार्ग सञ्चालनमा ल्याउन केही समय लाग्ने अनुमान गरिएको छ। सडक डिभिजन कार्यालयका प्राविधिक तथा खटिएका सुरक्षाकर्मीहरूले निरन्तर प्रयास गरिरहे तापनि पहिरो हटाएर दुईतर्फी यातायात सञ्चालन गर्न कम्तीमा पाँच घण्टाभन्दा बढी समय लाग्ने प्रहरीले जनाएको छ।

राजमार्ग ठप्प भएपछि काठमाडौंबाट मुग्लिनतर्फ गइरहेका र देशका विभिन्न भागबाट राजधानी काठमाडौं प्रवेश गर्न लागेका सवारी साधनहरू बीच बाटोमै रोकिएका छन्। विशेषगरी बिहानको समयमा गन्तव्यतर्फ हिँडेका यात्रु, बिरामी बोकेका एम्बुलेन्स तथा खाद्यान्न बोकेका मालवाहक ट्रकहरू सडकमै अलपत्र परेका छन्। लामो समय सडक बन्द हुँदा यात्रुहरूले सास्ती व्यहोर्नुपरेको छ।

पृथ्वी राजमार्गको मुग्लिन–नागढुंगा खण्डअन्तर्गत पर्ने घोप्टेभिर क्षेत्र भौगोलिक रूपमा अत्यन्तै जोखिमयुक्त मानिन्छ। यस क्षेत्रमा टोपोगा्राफी जटिल भएका कारण वर्षात्को समयमा मात्र नभई सुक्खा याममा समेत बारम्बार पहिरो खस्ने समस्या रहँदै आएको छ। सडक फराकिलो बनाउने र भित्तो काट्ने काम भएका ठाउँहरूमा निरन्तर चट्टान खस्ने खतरा कायमै रहेको सडक प्राविधिकहरू बताउँछन्।

प्रहरी तथा स्थानीय प्रशासनले राजमार्ग भएर यात्रा गर्ने यात्रु तथा सवारी चालकहरूलाई धैर्यता अपनाउन र सम्भव भएसम्म वैकल्पिक मार्गको प्रयोग गर्न आग्रह गरेका छन्। हतारमा यात्रा नगरी सडकको अवस्थाबारे जानकारी लिएर मात्रै यात्रा अघि बढाउन जिल्ला प्रहरी कार्यालय चितवनले अनुरोध गरेको छ। पहिरो पन्छाउने काम तीव्रताका साथ अघि बढेकाले मध्याह्नसम्म सडक एकतर्फी भए पनि खुलाउने लक्ष्य राखिएको छ।