आरम्भ कप राष्ट्रिय अन्तरविद्यालय टेबल टेनिस भदौ ३१ देखि

२३ भदौ, काठमाडौं ।

आरम्भ संस्कार विद्यालयको आयोजनामा आगामी भदौ ३१ गतेदेखि आरम्भ कप राष्ट्रिय अन्तरविद्यालय टेबल टेनिस प्रतियोगिता काठमाडौंमा सञ्चालन हुने भएको छ। सोमबार आयोजित पत्रकार सम्मेलनमा विद्यालयका प्रधानाध्यापक नरेशप्रसाद श्रेष्ठले प्रतियोगिताको विस्तृत विवरण सार्वजनिक गर्दै तयारी तीव्र पारिएको जानकारी दिनुभयो।

विद्यालयस्तरमै टेबल टेनिस खेलको प्रवर्द्धन गर्ने र युवा प्रतिभाहरूलाई प्रोत्साहन गर्ने उद्देश्यले आयोजना गर्न लागिएको यस राष्ट्रिय प्रतियोगितामा कूल १० वटा विधामा प्रतिस्पर्धा हुनेछ। प्रतियोगितामा छात्र तथा छात्रातर्फ टिम इभेन्टका साथै यु-१०, यु-१२, यु-१४ र यु-१६ उमेर समूहका ब्वाइज तथा गर्ल्स सिंगल्स स्पर्धा समावेश गरिएका छन्।

देशभरका विभिन्न विद्यालयहरूबाट उदीयमान खेलाडीहरूको उत्साहजनक सहभागिता रहने अपेक्षा गरिएको यस प्रतियोगितामा हरेक सिंगल्स स्पर्धाका शीर्ष स्थान हासिल गर्ने खेलाडीहरूलाई पदक, प्रमाण-पत्रका साथै विशेष पुरस्कार प्रदान गरिने आयोजकले जनाएको छ। उमेर समूहका खेलाडीहरूलाई राष्ट्रिय स्तरको अनुभव र एक्सपोजर प्रदान गर्न यो प्रतियोगिता कोशेढुंगा साबित हुने विश्वास लिइएको छ।

पत्रकार सम्मेलनमा बोल्दै प्रधानाध्यापक श्रेष्ठले आरम्भ संस्कार विद्यालयले शैक्षिक विकासका साथसाथै अतिरिक्त क्रियाकलाप र खेलकुद क्षेत्रलाई सधैं उच्च प्राथमिकतामा राख्दै आएको बताउनुभयो। विद्यालय तहबाटै खेलाडीको जग बलियो बनाउन सकिएमा भविष्यमा देशले अन्तर्राष्ट्रिय स्तरका प्रतिस्पर्धी खेलाडी प्राप्त गर्ने उहाँको भनाइ थियो।

भदौ ३१ गतेदेखि सञ्चालन हुने यस प्रतियोगिताका लागि आवश्यक प्राविधिक तथा व्यवस्थापकीय तयारीलाई अन्तिम रूप दिने काम भइरहेको छ। सहभागी खेलाडी तथा टोलीहरूका लागि आवश्यक सम्पूर्ण खेल सामग्री र भौतिक पूर्वाधारको उचित प्रबन्ध मिलाइएको विद्यालय प्रशासनले जनाएको छ।