नेपाली काँग्रेसको १५औँ महाधिवेशन: डा. भद्रा विजयी

३१ असोज, काठमाडौं ।

नेपाली काँग्रेसको १५औँ महाधिवेशन अन्तर्गत खस आर्य महिला समूहको केन्द्रीय सदस्य पदमा डा. भद्रा पराजुली भण्डारी सर्वाधिक मत प्राप्त गर्दै पहिलो नम्बरमा विजयी भएकी छन्। काठमाडौँमा सम्पन्न मतगणनाको अन्तिम परिणाम अनुसार कुल खसेको ७ हजारभन्दा बढी मतमध्ये ३ हजार १६६ मत प्राप्त गरी डा. भण्डारीले शानदार जित हासिल गरेकी हुन्। प्रतिस्पर्धीहरूलाई निकै पछि पार्दै उनले केन्द्रीय कार्यसमितिमा आफ्नो बलियो उपस्थिति दर्ता गराएकी हुन्।

नेपाली काँग्रेसको विधान अनुसार खस आर्य महिला कोटाबाट कुल ८ जना केन्द्रीय सदस्य निर्वाचित हुने व्यवस्था रहेको छ। सोही व्यवस्था बमोजिम भएको प्रतिस्पर्धामा डा. भण्डारीले सर्वाधिक मत ल्याएर अग्रणी स्थान हासिल गरेकी हुन्। पार्टीभित्र बौद्धिक र निष्ठावान् नेत्रीका रूपमा परिचित डा. भण्डारीको यो जितलाई महाधिवेशन प्रतिनिधिहरूले दिएको उच्च मूल्याङ्कनका रूपमा हेरिएको छ।

यस समूहबाट केन्द्रीय सदस्यका लागि दर्जनाैँ प्रभावशाली महिला नेत्रीहरू चुनावी मैदानमा उत्रिएका थिए। निर्वाचनमा जानुका पन्त, गीता देवकोटा, जानकी सिंह, अम्बिका सुवेदी, कृष्णकुमारी बस्नेत, सरिता तिम्सिना पंगेनी, चम्पादेवी खड्का, सन्तोषी साउद ऐरी, उर्मिला कँडेल र शोभा अधिकारी लगायतका उम्मेदवारहरू प्रतिस्पर्धामा थिए। त्यसैगरी बिन्दु मल्ल ठकुरी, निर्मला वस्ताकोटी, हिरा भट्टराई, सीतादेवी पौडेल, सुजना कार्की, प्रमिला लम्साल, सरस्वती भट्ट, कमला लामिछाने, सीता ज्ञवाली, माधवी शर्मा वाग्ले र शान्ता बास्कोटा लगायतका नेत्रीहरूले पनि उम्मेदवारी दिएका थिए।

काँग्रेसको यस महाधिवेशनमा समावेशी क्लस्टरहरूतर्फको प्रतिस्पर्धा निकै रोचक र पेचिलो बनेको थियो। डा. भण्डारीले प्राप्त गरेको मत परिणामले पार्टीभित्रको रूपान्तरण र अध्ययनशील नेतृत्वप्रतिको विश्वासलाई उजागर गरेको विश्लेषण गरिएको छ। पार्टीको नीति, निर्माण र सङ्गठन सुदृढीकरणमा आफ्नो तर्फबाट महत्त्वपूर्ण योगदान रहने प्रतिबद्धता उनले व्यक्त गर्दै आएकी छन्।

नेपाली काँग्रेसको १५औँ महाधिवेशनले नयाँ केन्द्रीय कार्यसमिति चयनका क्रममा विभिन्न क्लस्टरबाट ऊर्जाशील नेतृत्वलाई अगाडि बढाएको छ। खस आर्य महिला कोटाका अन्य विजयी उम्मेदवारहरूको अन्तिम नामावली र मतपरिणामसमेत सार्वजनिक भइसकेको छ। निर्वाचन परिणाम सार्वजनिक भएसँगै नवनिर्वाचित केन्द्रीय सदस्य डा. भण्डारीलाई महाधिवेशन प्रतिनिधि, कार्यकर्ता तथा शुभेच्छुकहरूले बधाई एवं सफल कार्यकालको शुभकामना व्यक्त गरिरहेका छन्।