रवीन्द्र ढाँट रोड टु युएफसीको फाइनलमा प्रवेश

१२ भदौ, काठमाडौं ।

रवीन्द्र ढाँट रोड टु युएफसीको ऐतिहासिक फाइनल चरणमा प्रवेश गरेका छन्। चीनको साङ्घाईस्थित अक्टागनमा आयोजित रोड टु युएफसी सिजन-५ को बान्टमवेट विधाको सेमिफाइनल भिडन्तमा न्युजिल्यान्डका अपराजित फाइटर कासिब मर्डोकलाई पराजित गर्दै नेपाली मिक्स मासल आर्ट्स (एमएमए) फाइटर रवीन्द्र ढाँटले उपाधि नजिकको यात्रा तय गरेका हुन्। अत्यन्तै प्रतिस्पर्धात्मक बनेको उक्त तीन राउन्डको खेलमा रवीन्द्रले स्प्लिट डिसिजनका आधारमा न्युजिल्यान्डका प्रतिस्पर्धीमाथि सानदार जित दर्ता गराएका हुन्।

साङ्घाईमा सम्पन्न खेलमा दुवै फाइटरहरूले उत्कृष्ट कौशल प्रस्तुत गरेका थिए। तीनै राउन्डसम्म चलेको कडा भिडन्तमा पहिलो जजले रवीन्द्रको पक्षमा २९-२८ को अंक दिएका थिए भने दोस्रो जजले कासिबको पक्षमा २९-२८ को अंक दिएका थिए। तेस्रो जजको निर्णय पनि रवीन्द्रको पक्षमा आएपछि उनी २-१ को स्प्लिट डिसिजनका आधारमा विजयी घोषित भए। यस जितसँगै रवीन्द्रले कासिबको हालसम्मको अपराजित यात्रामा समेत पूर्णविराम लगाइदिएका छन्।

अन्तर्राष्ट्रिय एमएमए मञ्चमा नेपाली फाइटरको यो सफलतालाई निकै महत्त्वका साथ हेरिएको छ। विश्व प्रसिद्ध फाइटिङ अर्गनाइजेसन युएफसी (अल्टीमेट फाइटिङ च्याम्पियनसिप) मा प्रवेश पाउने उद्देश्यका साथ सञ्चालित रोड टु युएफसी प्रतियोगिता एसियाली महाद्वीपका उदीयमान फाइटरहरूका लागि सबैभन्दा ठूलो अवसर मानिन्छ। यस प्रतियोगिताको फाइनल जित्ने खेलाडीले युएफसीसँग प्रत्यक्ष व्यावसायिक सम्झौता प्राप्त गर्ने नियम रहेको छ।

बान्टमवेट विधामा आफ्नो वजन र कौशलको सही सदुपयोग गर्दै रवीन्द्रले रिङभित्र देखाएको धैर्यता र रणनीतिक खेलको सर्वत्र प्रशंसा भइरहेको छ। रिङभित्र विपक्षीको कडा आक्रमणलाई बुद्धिमानीपूर्वक विफल पार्दै अंक जोड्न सफल भएका रवीन्द्रले नेपाली खेलकुद क्षेत्रमा नयाँ इतिहास रच्ने संकेत गरेका छन्। यसअघि पनि विभिन्न अन्तर्राष्ट्रिय तथा क्षेत्रीय एमएमए प्रतियोगिताहरूमा नेपालको प्रतिनिधित्व गर्दै सफलता हासिल गरिसकेका ढाँटको यो हालसम्मकै ठूलो उपलब्धि हो।

अब फाइनल भिडन्तमा जित हासिल गर्न सके रवीन्द्र युएफसीको आधिकारिक फाइटर बन्ने पहिलो नेपाली खेलाडी बन्नेछन्। यो जितसँगै नेपालमा एमएमए खेलप्रति नयाँ पुस्ताको आकर्षण थप बढ्ने र अन्तर्राष्ट्रिय स्तरमा नेपाली खेलाडीहरूको क्षमताको उच्च मूल्यांकन हुने विश्वास लिइएको छ। रवीन्द्रको ऐतिहासिक जितपछि स्वदेश तथा विदेशमा रहेका नेपाली खेलप्रेमीहरूले उनलाई सामाजिक सञ्जालमार्फत बधाई दिँदै फाइनल उपाधिका लागि शुभकामना व्यक्त गरिरहेका छन्।