टिकटकर तुलसा अधिकारीलाई थुनामै राख्ने आदेश सदर

१३ कात्तिक, काठमाडौं ।

चर्चित टिकटकर तुलसा अधिकारी (तुलसा कलेक्सन) लाई पुर्पक्षका लागि थुनामा राख्ने जिल्ला अदालतको आदेशलाई उच्च अदालत पाटनले सदर गरेको छ। आपराधिक लाभ, संगठित अपराध तथा सम्पत्ति शुद्धीकरणजस्ता गम्भीर अभियोगमा थुनामा रहेकी अधिकारीले थुनामुक्त हुनका लागि दिएको पुनरावेदन निवेदनमाथि सुनुवाइ गर्दै उच्च अदालतले जिल्लाकै आदेशलाई निरन्तरता दिएको हो। यस निर्णयसँगै अब उनले मुद्दाको अन्तिम फैसला नभएसम्म जेलमै बसेर कानुनी लडाइँ लड्नुपर्ने भएको छ।

उच्च अदालत पाटनका न्यायाधीशद्वय खड्कबहादुर केसी र केशवप्रसाद अधिकारीको संयुक्त इजलासले ललितपुर जिल्ला अदालतको अघिल्लो निर्णय कानुनसम्मत र रीतपूर्वक भएको ठहर गरेको छ। इजलासले मिसिल संलग्न प्रमाणहरूका आधारमा तत्काल थुनामुक्त गर्न नमिल्ने स्पष्ट पार्दै मुद्दाको किनारा नलागेसम्म टिकटकर तुलसा अधिकारी लाई पुर्पक्षका लागि थुनामै राख्ने निर्णय सही भएको आदेश जारी गरेको छ।

अधिकारीविरुद्ध कुल २१ करोड १२ लाख २० हजार ४०६ रुपैयाँ १६ पैसा बिगो मागदाबी गर्दै अभियोगपत्र दर्ता गरिएको छ। उनीमाथि संगठित अपराध निवारण ऐन, २०७० को दफा ३ र ८ अनुसार गैरकानुनी रूपमा आपराधिक लाभ (एक्सटर्सन) लिएको, हुन्डीमार्फत आर्जित सम्पत्तिको स्रोत र स्थान बदलेको तथा सम्पत्ति शुद्धीकरण (मनी लाउण्डरिङ्ग) निवारण ऐन, २०६४ विपरीत कसूर गरेको आरोप छ। सरकारी वकिलको कार्यालयले दर्ता गरेको अभियोगपत्रमा पीडितलाई क्षतिपूर्ति दिलाउनुका साथै कानुनबमोजिम कडा भन्दा कडा सजायको माग गरिएको छ।

उच्च अदालतले जिल्ला अदालतको आदेश सदर गर्दा मुख्यतया चारवटा प्रमुख आधार र प्रमाणहरूलाई औंल्याएको छ। मुख्य जाहेरवाला कुमार चामोरियाको जाहेरी दरखास्त, थप विवरणसहितको निवेदनका साथै विना कुमारी चामोरिया, नवराज आचार्य, रुद्रप्रसाद आचार्य, हेमराज रसाइली र नितु गुसालगायतका व्यक्तिहरूले मौकामा गरिदिएको कागज र प्रहरी प्रतिवेदनलाई अदालतले बलियो प्रमाणका रूपमा लिएको छ। त्यसैगरी, प्रतिवादी स्वयंले अदालतसमक्ष बयान दिने क्रममा जाहेरवालासँग आफ्नो आर्थिक तथा व्यक्तिगत सम्बन्ध रहेको स्वीकार गरेकी छन्।

यसबाहेक, अधिकारीको नाममा सञ्चालित ‘तुलसा कलेक्सन प्रा.लि.’ ले सम्बन्धित सरकारी निकायमा पेस गरेको आय–व्यय विवरणमा वास्तविकताभन्दा घटी कारोबार देखाएको र त्यो आफ्नै कमजोरी रहेको भनी उनले बयानमै उल्लेख गरेकी थिइन्। अदालतले हालसम्म प्राप्त प्रमाण र प्रतिवादीको बयानका आधारमा ललितपुर जिल्ला अदालतले २०८१ जेठ २१ गते गरेको पुर्पक्ष थुनाको आदेश बेरीतको नदेखिएको निष्कर्ष निकालेको छ। यो आदेशसँगै चर्चित टिकटकर तुलसा अधिकारी को थुनामुक्त हुने प्रयास हालका लागि असफल भएको छ।