न्यायाधीश श्रीकान्त पौडेलद्वारा भ्रामक समाचारको खण्डन

१३ कात्तिक, काठमाडौं ।

सर्वोच्च अदालतका न्यायाधीश श्रीकान्त पौडेलले पछिल्लो समय केही सञ्चारमाध्यममा आफूसँग जोडेर प्रकाशित भएका समाचारप्रति गम्भीर आपत्ति जनाउँदै तिनको खण्डन गर्नुभएको छ। उहाँले एक प्रेस विज्ञप्ति जारी गर्दै गलत मनसायका साथ आफ्नाविरुद्ध अनर्गल प्रचार गरिएको र समाचारमा उल्लेख गरिएका व्यक्तिहरूसँग आफ्नो कुनै पनि किसिमको भेटघाट नभएको स्पष्ट पार्नुभएको हो।

प्रकाशित विज्ञप्तिमा न्यायाधीश पौडेलले अदालतमा विचाराधीन मुद्दाको सुनुवाइका क्रममा इजलासमा विषयवस्तुमा छलफल हुनु बाहेक कुनै पनि आदेश गर्नुअघि वा पछि सम्बन्धित पक्षहरूसँग अवाञ्छित सम्पर्क वा भेटघाट नभएको दाबी गर्नुभएको छ। सञ्चारमाध्यममा आएका भ्रामक खबरहरूले न्यायिक कार्यप्रति नकारात्मक सन्देश प्रवाह गर्न खोजेको उहाँको भनाइ छ।

न्याय सम्पादनको कार्यमा आफू निष्ठापूर्वक प्रतिबद्ध रहेको उल्लेख गर्दै न्यायाधीश श्रीकान्त पौडेलले स्वतन्त्र, निष्पक्ष र सक्षम न्यायपालिकाको साख जोगाउन आफू सधैँ तत्पर रहेको बताउनुभएको छ। हचुवाका भरमा व्यक्ति र निष्ठामाथि आघात पुग्ने गरी सम्प्रेषित समाचारले समग्र न्याय प्रणालीप्रति नै जनआस्था घट्न सक्ने जोखिम रहने उहाँको ठहर छ।

केही समययता केही अनलाइन पोर्टलहरूमा मुद्दाका पक्षहरूसँग भेटघाट भएको भन्दै पौडेलको नाम जोडेर समाचारहरू सार्वजनिक गरिएका थिए। यस्ता आधारहीन दाबीहरूलाई निरस्त गर्दै न्यायाधीश पौडेलले आफूले सधैँ न्यायिक आचारसंहिता र संवैधानिक दायित्वभित्र रहेर मात्र कार्य सम्पादन गर्दै आएको पुनः स्पष्ट पार्नुभएको छ।

नेपालको संविधान र प्रचलित कानुनले न्यायाधीशहरूलाई कुनै पनि प्रभाव वा दबाबविना न्याय निरुपण गर्ने अधिकार प्रदान गरेको छ। यसै संवैधानिक मर्मअनुसार कार्य गरिरहेको अवस्थामा आधारहीन आरोप लगाउनु न्यायपालिकामाथिको प्रहार भएको भन्दै कानुनी वृत्तमा समेत यस विषयलाई चासोका साथ हेरिएको छ।

अन्तमा, न्यायाधीश पौडेलले सम्पूर्ण सञ्चार जगत्‌लाई सत्यतथ्य जाँच गरेर मात्र जिम्मेवार र वस्तुनिष्ठ समाचार सम्प्रेषण गर्न आग्रह गर्नुभएको छ। अनावश्क भ्रम सिर्जना नगरी न्याय प्रणालीको मर्यादा कायम राख्न सहयोग पुर्‍याउनु सबै पक्षको दायित्व हुने विज्ञप्तिमा उल्लेख छ।