कौडा खेलिरहेका ३७ जना पक्राउ: काठमाडौँको गागलफेदीस्थित होमस्टेमा प्रहरीको छापा -

२८ कात्तिक, काठमाडौं ।

काठमाडौँको कागेश्वरी मनोहरा नगरपालिका–१ स्थित गागलफेदीमा गैरकानुनी रूपमा कौडा खेलिरहेको अवस्थामा प्रहरीले ३७ जनालाई पक्राउ गरेको छ। प्रहरी वृत्त बौद्धबाट खटिएको विशेष प्रहरी टोलीले स्थानीय एक होमस्टेमा छापा मारी उनीहरूलाई नियन्त्रणमा लिएको हो।

प्रहरीका अनुसार गागलफेदीमा सञ्चालित ‘कुशुम छयाम्बा हाउस एन्ड होमस्टे’मा ठूलो धनराशि बाजी राखेर कौडा तथा जुवातास खेलिरहेको भन्ने विशेष सूचनाका आधारमा यो कारबाही गरिएको हो। सूचना प्राप्त हुनासाथ पुगेको बौद्ध प्रहरीको टोलीले कौडा खेलिरहेकै अवस्थामा उनीहरूलाई घेराबन्दी गरी पक्राउ गर्न सफल भएको थियो।

पक्राउ परेका व्यक्तिहरूका साथबाट बरामद भएको नगद रकम तथा कौडाको परिमाणबारे प्रहरीले मुचुल्का उठाउने कार्य गरिरहेको जनाएको छ। पक्राउ परेका सबै जनालाई प्रहरी वृत्त बौद्धको हिरासतमा राखी मुलुकी अपराध संहिता बमोजिम गैरकानुनी जुवातास सम्बन्धी कसुरमा थप अनुसन्धान अगाडि बढाइएको प्रहरीले जानकारी दिएको छ।

पछिल्लो समय काठमाडौँ उपत्यकाका विभिन्न उपकण्ठ, रिसोर्ट तथा होमस्टेहरूमा गैरकानुनी रूपमा जुवातास खेलाउने क्रम बढेको भन्दै उपत्यका प्रहरी कार्यालयले निगरानी बढाएको छ। सहरी क्षेत्रभन्दा केही टाढा र एकान्त स्थानमा रहेका होमस्टेहरूलाई जुवातास खेल्ने अखडा बनाउने प्रवृत्ति बढेकाले प्रहरीले यस्ता स्थानहरूमा विशेष अपरेसन सञ्चालन गरिरहेको छ।

प्रहरीले सर्वसाधारणलाई गैरकानुनी जुवातास तथा सट्टेबाजी जस्ता असामाजिक क्रियाकलापमा संलग्न नहुन र आफ्नो छरछिमेकमा यस्ता गतिविधि भएको पाइएमा तत्काल नजिकैको प्रहरी कार्यालयमा खबर गर्न समेत आग्रह गरेको छ।