एलपी ग्यास बिक्रीमा भ्याट बिल अनिवार्य गर्न निगमको निर्देशन

१० कात्तिक, काठमाडौं ।

काठमाडौं। नेपाल आयल निगमले खाना पकाउने एलपी ग्यास बिक्रीमा भ्याट बिल अनिवार्य रूपमा जारी गर्न सबै ग्यास उद्योग तथा बिक्रेताहरूलाई कडा निर्देशन दिएको छ। बजारमा ग्यास बिक्री वितरण गर्दा आम उपभोक्ता तथा डिलरहरूलाई नियमानुसार बिलबिजक नदिने गरिएको भन्दै व्यापक गुनासो आएपछि निगमले यो कदम चालेको हो।

निगमको एलपी ग्यास तथा एभिएसन विभागले देशभर सञ्चालित सबै ग्यास उद्योगहरूलाई औपचारिक पत्र पठाउँदै भ्याट बिल जारी गर्ने व्यवस्था मिलाउन निर्देशन दिएको छ। आयल निगमका निर्देशक इन्जिनियर विनितमणि उपाध्यायद्वारा हस्ताक्षरित सो पत्रमा ग्यास उद्योगबाट नियुक्त आधिकारिक बिक्रेता तथा खुद्रा विक्रेताहरूले अनिवार्य रूपमा ग्राहकलाई नियमानुसारको भ्याट बिलबिजक बुझाएर मात्र ग्यास बिक्री वितरण गर्नुपर्ने स्पष्ट पारिएको छ।

यसअघि पनि निगमले ग्यास बिक्रीमा भ्याट बिल अनिवार्य गर्न पटक-पटक पत्राचार गरिसकेको छ। निगमका अनुसार वि.सं. २०८१ साउन ३० गते र वि.सं. २०८१ माघ १० गते पनि सम्बन्धित ग्यास उद्योगी तथा व्यवसायी सङ्घ-संस्थालाई पत्राचार गरी सोही विषयमा ध्यानाकर्षण गराइएको थियो। तर, बजारमा अझै पनि धेरै बिक्रेताहरूले बिना बिलबिजक ग्यास बिक्री गरिरहेको र उपभोक्ताले अधिकारबाट वञ्चित हुनुपरेको गुनासो आउने क्रम नरोकिएपछि पुनः ताकेता गरिएको हो।

नेपालमा खाना पकाउने ग्यासको पहुँच अधिकांश घरधुरीसम्म पुगेको छ। तर, खुद्रा तहमा स्पष्ट बिल नपाउँदा उपभोक्ताहरूले सरकारले तोकेको आधिकारिक मूल्यभन्दा बढी तिर्नुपरेको गुनासो गर्दै आएका छन्। एलपी ग्यास बिक्रीमा भ्याट बिल अनिवार्य गर्दा उपभोक्ताले सही मूल्यमा गुणस्तरीय सेवा पाउने र ठगी हुने सम्भावना न्यूनीकरण हुने विश्वास लिइएको छ।

राजस्व प्रशासनका दृष्टिले पनि ग्यास क्षेत्रमा भ्याट बिलको प्रयोग अत्यन्त महत्त्वपूर्ण मानिन्छ। ग्यास उद्योगदेखि अन्तिम उपभोक्तासम्मको सम्पूर्ण बिक्री शृङ्खलालाई पारदर्शी बनाउन र राज्यको राजस्व अभिवृद्धि गर्न यस व्यवस्थाले सहयोग पुर्‍याउनेछ। अनौपचारिक रूपमा हुने कारोबारलाई निरुत्साहित गर्दै वैध र पारदर्शी व्यापार प्रवर्द्धनका लागि निगमले ताकेता गरेको हो।

नेपाल आयल निगमले उद्योगी तथा बिक्रेताहरूलाई निर्देशनको पूर्ण पालना गर्न आग्रह गर्दै यसको अनुगमनलाई समेत तीव्र बनाइने जनाएको छ। यदि कुनै बिक्रेता वा उद्योगले भ्याट बिल जारी नगरी ग्यास बिक्री गरेको पाइएमा प्रचलित कानुनबमोजिम कारबाही प्रक्रिया अघि बढाइने चेतावनीसमेत निगमले दिएको छ। यस कदमले आम उपभोक्तालाई आफ्नो अधिकारप्रति सचेत गराउनुका साथै नेपाली ग्यास बजारलाई थप व्यवस्थित र उत्तरदायी बनाउने अपेक्षा गरिएको छ।