तामाङ सम्पदा र रुविभ्याली पदमार्ग पुनः खुला

८ कात्तिक, काठमाडौं ।

काठमाडौँ । बाढीका कारण अवरुद्ध बनेका रसुवा तथा धादिङका प्रसिद्ध तामाङ सम्पदा र रुविभ्याली पदमार्ग मर्मत तथा अस्थायी संरचना निर्माणपछि पुनः पर्यटकका लागि पूर्ण रूपमा खुला गरिएको छ। गत भदौ १० गते रसुवाको भोटेकोशी नदीमा आएको विनाशकारी बाढीका कारण क्षतिग्रस्त बनेको पदमार्ग क्षेत्रमा अस्थायी रूपमा काठको फड्के निर्माण गरी आवागमन सहज बनाइएको हो।

भोटेकोशी नदीमा आएको भीषण बाढीले स्याफ्रुबेँसीस्थित पदमार्ग र नदी किनारका पूर्वाधारमा ठूलो क्षति पुर्‍याएको थियो। बाटो र आवतजावत गर्ने माध्यम नष्ट भएपछि विगत केही समयदेखि सो क्षेत्रमा पदयात्रा स्थगित बनेको थियो। पर्यटकीय सिजनको सुरुवातमै पदमार्ग ठप्प भएपछि चिन्तित बनेका स्थानीय सरोकारवाला र व्यवसायीहरूको सक्रियतामा स्याफ्रुबेँसीस्थित भोटेकोशी नदीमा काठको अस्थायी फड्के तयार पारिएको हो।

तामाङ सम्पदा पदमार्ग उत्तरी रसुवाको पर्यटकीय पहिचान बोकेको मुख्य गन्तव्य मानिन्छ। परम्परागत तामाङ संस्कृति, स्थानीय जीवनशैली, जैविक विविधता तथा मनोरम हिमशृंखलाको दृश्यावलोकनका लागि यो पदमार्ग प्रख्यात छ। विशेष गरी शरद ऋतुको पर्यटकीय सिजनमा ठूलो संख्यामा स्वदेशी तथा विदेशी पर्यटकहरू यस क्षेत्रको भ्रमणमा निस्कने गर्छन्। बाटो खुला भएसँगै पर्यटन व्यवसायीहरूमा नयाँ उत्साह थपिएको छ।

यसैगरी, रसुवा र धादिङ जिल्लाको सीमा क्षेत्रलाई जोड्ने रुविभ्याली पदमार्ग पनि गणेश हिमाल क्षेत्रको प्राकृतिक सौन्दर्यका लागि परिचित छ। धादिङको रुविभ्याली हुँदै रसुवासम्म जोडिने यो पदमार्ग साहसिक पदयात्रा रुचाउने पर्यटकहरूका लागि प्रमुख रोजाइमा पर्ने गर्छ। बाढीका कारण पदमार्ग अवरुद्ध हुँदा यस क्षेत्रको स्थानीय अर्थतन्त्र र पर्यटन गतिविधि प्रत्यक्ष रूपमा प्रभावित भएको थियो।

नयाँ निर्माण गरिएको फड्केका कारण अब पर्यटक तथा स्थानीय बासिन्दाहरू निर्धक्क रूपमा आवतजावत गर्न सक्ने वातावरण बनेको छ। यद्यपि, अस्थायी फड्केबाट तत्कालका लागि राहत मिले पनि दीर्घकालीन समाधानका लागि बलियो र स्थायी पक्की पुल निर्माण गर्न स्थानीय व्यवसायीहरूले सरकारसँग जोडदार माग गरेका छन्। आगामी दिनमा थप क्षति हुन नदिन र पर्यटन सुरक्षा सुनिश्चित गर्न पदमार्गको स्तरोन्नति अपरिहार्य मानिएको छ।