थामी भाषाको राष्ट्रिय गीत पहिलो पटक सार्वजनिक

१५ कात्तिक, काठमाडौं ।

नेपाल थामी समाजले आफ्नो २७औँ वार्षिक साधारणसभाका अवसरमा काठमाडौँमा आयोजित विशेष समारोहका बीच पहिलो पटक थामी भाषाको राष्ट्रिय गीत सार्वजनिक गरेको छ। बागमती प्रदेशसभा सदस्य ठूला थामी, कालिञ्चोक गाउँपालिकाका अध्यक्ष अर्जुनप्रसाद शिवाकोटी र नेपाल आदिवासी जनजाति महासङ्घका उपाध्यक्ष अमृत सुनुवारले संयुक्त रूपमा उक्त ऐतिहासिक गीतको विमोचन गर्नुभएको हो। सीमान्तीकृत थामी समुदायको पहिचान, भाषा र संस्कृतिको प्रवर्द्धन गर्ने उद्देश्यले यो गीत तयार पारिएको समाजले जनाएको छ।

कार्यक्रममा बोल्दै बागमती प्रदेशसभा सदस्य ठूला थामीले मातृभाषामा राष्ट्रिय गीत निर्माण हुनु सम्पूर्ण थामी समुदायका लागि गर्वको विषय भएको बताउनुभयो। उहाँले लोपोन्मुख अवस्थामा पुगेको थामी भाषा र संस्कृतिको जगेर्नाका लागि राज्यका तर्फबाट उचित लगानी र नीतिगत सहयोगको आवश्यकतामा जोड दिनुभयो। थामी भाषाको संरक्षणले नेपालको बहुसांस्कृतिक र बहुभाषिक पहिचानलाई अझ मजबुत बनाउने उहाँको भनाइ थियो।

कालिञ्चोक गाउँपालिकाका अध्यक्ष अर्जुनप्रसाद शिवाकोटीले स्थानीय तहमा मातृभाषाको संरक्षण र विकासका लागि गाउँपालिका सदैव सकारात्मक रहेको व्यक्त गर्नुभयो। उहाँले सीमान्तीकृत समुदायको उत्थान र उनीहरूको भाषा, कला र संस्कृतिको विकासका लागि स्थानीय सरकारले बजेट र कार्यक्रम प्राथमिकताका साथ विनियोजन गर्दै आएको बताउनुभयो। यसैगरी, आदिवासी जनजाति महासङ्घका उपाध्यक्ष अमृत सुनुवारले आदिवासी जनजातिहरूको अधिकार र पहिचानको आन्दोलनमा भाषाको मुख्य भूमिका रहने धारणा राख्नुभयो।

नेपालका सीमान्तीकृत आदिवासी जनजातिहरूमध्ये थामी समुदाय मुख्यगरी दोलखा, सिन्धुपाल्चोक, रामेछाप लगायतका जिल्लाहरूमा सघन रूपमा बसोबास गर्दै आएका छन्। यस समुदायको आफ्नै मौलिक भेषभूषा, संस्कृति र भाषा भए तापनि आधुनिकताको प्रभाव र राज्यको पर्याप्त ध्यान नपुग्दा भाषा सङ्कटमा पर्दै गएको छ। यस्तो अवस्थामा सार्वजनिक भएको यो राष्ट्रिय गीतले युवा पुस्तालाई आफ्नो मातृभाषा सिक्न, बोल्न र यसप्रति गर्व गर्न प्रेरित गर्ने विश्वास लिइएको छ।

समाजका प्रतिनिधिहरूका अनुसार गीतमा थामी समुदायको ऐतिहासिक पृष्ठभूमि, प्राकृतिक जीवनशैली, पुर्खाको योगदान र भावी पुस्ताप्रतिको दायित्वलाई सङ्गीतमय रूपमा प्रस्तुत गरिएको छ। यो गीत सार्वजनिक भएसँगै थामी समुदायका विभिन्न औपचारिक तथा सांस्कृतिक कार्यक्रमहरूमा यसको प्रयोग गरिनेछ। यस कदमले नेपालका अन्य सङ्कटापन्न भाषा र संस्कृति संरक्षणका लागि पनि सकारात्मक सन्देश दिएको सरोकारवालाहरूको ठहर छ।