भूमिगत विद्युत लाइन विस्तार: काठमाडौँमा ८ दिन बिजुली कटौती

१४ कात्तिक, काठमाडौं ।

नेपाल विद्युत् प्राधिकरणले काठमाडौँ उपत्यकामा भूमिगत विद्युत लाइन विस्तार कार्यलाई तीव्रता दिएकाले आगामी आठ दिनसम्म विभिन्न क्षेत्रमा विद्युत् आपूर्ति प्रभावित हुने भएको छ। प्राधिकरण अन्तर्गतका कुलेश्वर तथा बानेश्वर वितरण केन्द्रअन्तर्गत पर्ने फिडरहरूमा विद्युत्का तार भूमिगत गर्ने कामलाई सुरक्षित एवं प्रभावकारी रूपमा सम्पन्न गर्न कात्तिक १३ गतेदेखि कात्तिक २० गतेसम्म दैनिक रूपमा बिजुली कटौती गर्न लागिएको हो। तोकिएका क्षेत्रहरूमा बिहान १०ः३० बजेदेखि दिउँसो ४ः०० बजेसम्म विद्युत् सेवा अवरुद्ध रहने जानकारी गराइएको छ।

प्राधिकरणद्वारा जारी सूचना अनुसार कात्तिक १३ गते बलम्बु, थानकोट र मातातीर्थ फिडरअन्तर्गत पर्ने हाइभिजन कोलोनी क्षेत्रमा विद्युत् कटौती गरिएको छ। यसै गरी, कात्तिक १४ गते सीतापाइला फिडरअन्तर्गत पर्ने कलंकी रिङरोडदेखि स्युचाटार सबस्टेसनसम्मको क्षेत्रमा विद्युत् आपूर्ति बन्द हुनेछ। कात्तिक १५ गते भने थानकोट तथा रोपवे फिडरअन्तर्गत कलंकी चोकदेखि ढुंगेअड्डासम्मको सडकखण्ड वरपरका उपभोक्ताहरू बिजुली कटौतीबाट प्रभावित हुने प्राधिकरणले जनाएको छ।

विद्युत् लाइन भूमिगत गर्ने तालिका अनुसार कात्तिक १६ गते बाफल फिडरअन्तर्गत कलंकी रिङरोडदेखि स्युचाटार सबस्टेसन क्षेत्रमा पुनः बिजुली बन्द गरिनेछ। त्यसै गरी बानेश्वर वितरण केन्द्र अन्तर्गत पर्ने शंखमुल फिडर क्षेत्रमा कात्तिक १७ गते निर्माण कार्य हुने भएकाले युएनपार्कदेखि बिजुलीबजारसम्मको क्षेत्रमा विद्युत् आपूर्ति रोकिनेछ। कात्तिक १८ र २० गते सतुंगल फिडरअन्तर्गत धौलागिरि आवास तथा मातातीर्थ पीएसएस क्षेत्रमा र कात्तिक १९ गते स्युचाटार एस.एस. फिडरअन्तर्गत पर्ने हाजमा पुल क्षेत्रमा विद्युत् कटौती हुनेछ।

काठमाडौँ उपत्यकामा बढ्दो सहरीकरण, अव्यवस्थित तारका गुजुल्टा र सम्भावित विद्युतीय दुर्घटना न्यूनीकरणका लागि भूमिगत विद्युत लाइन विस्तार आयोजना सञ्चालन गरिएको हो। सहरको भौतिक सुन्दरता अभिवृद्धि गर्न तथा मौसमी प्रतिकूलताका कारण हुने विद्युत् अवरोधलाई स्थायी रूपमा हल गर्न तार भूमिगत गर्ने कार्यलाई उच्च प्राथमिकता दिइएको छ। ओभरहेड प्रणालीलाई भूमिगत प्रणालीमा रूपान्तरण गर्दा प्रणालीको क्षमता अभिवृद्धि हुनुका साथै वितरण नोक्सानी घट्ने र सुरक्षित विद्युत् प्रवाह सुनिश्चित हुने विश्वास प्राधिकरणले लिएको छ।

भूमिगत तार बिछ्याउने र जोड्ने प्राविधिक कार्य निकै जोखिमपूर्ण हुने भएकाले सुरक्षाका दृष्टिकोणले विद्युत् बन्द गरेर मात्र काम गर्नुपर्ने बाध्यता रहेको प्राधिकरणको भनाइ छ। यदि निर्धारित अवधिमा मौसम प्रतिकूल भएमा वा वर्षा भएमा सो दिनको विद्युत् कटौती सम्बन्धी तालिका परिवर्तन वा रद्द हुन सक्ने स्पष्ट पारिएको छ। आयोजना सम्पन्न भएपछि सहरी सौन्दर्यता बढ्नुका साथै दीर्घकालीन रूपमा गुणस्तरीय बिजुली उपलब्ध हुने भएकाले निर्माण कार्यका क्रममा उपभोक्तामा पर्न जाने असुविधाप्रति प्राधिकरणले क्षमायाचना गर्दै सहयोगको अपेक्षा गरेको छ।

नेपाल विद्युत् प्राधिकरणले काठमाडौँ उपत्यकाका मुख्य मुख्य सहरी सडकहरूमा विद्युत् लाइन भूमिगत गर्ने आयोजनालाई चरणबद्ध रूपमा अघि बढाइरहेको छ। चक्रपथ, रत्नपार्क, महाराजगञ्ज, कुलेश्वर र बानेश्वर लगायतका प्रमुख क्षेत्रहरूमा तार भूमिगत गर्ने काम भइरहेको छ। यस प्रविधिले विद्युतीय दुर्घटना कम गर्नुका साथै टेलिफोन र इन्टरनेटका गुजुल्टिएका तारहरूलाई समेत व्यवस्थित गर्न सहयोग पुर्‍याउनेछ। तोकिएकै समयमा काम सम्पन्न गरी सर्वसाधारणलाई सहज रूपमा बिजुली उपलब्ध गराउन प्राविधिक टोलीहरू खटाइएको छ।