बूढानीलकण्ठ कृषक सम्मेलन तथा कृषि प्रदर्शनी मेला सुरु

२० कात्तिक, काठमाडौं ।

काठमाडौँको बूढानीलकण्ठमा स्थानीय कृषि उत्पादनको प्रवर्द्धन र बजारीकरणलाई तीव्र पार्ने उद्देश्यका साथ दुईदिने बूढानीलकण्ठ कृषक सम्मेलन तथा कृषि पशु उत्पादन प्रदर्शनी मेला सुरु भएको छ। बूढानीलकण्ठ नगरपालिकाको मुख्य आयोजनामा सञ्चालन भएको यस मेलाले नगर क्षेत्रभित्रका कृषकहरूले उत्पादन गरेका कृषि तथा पशुजन्य वस्तुको प्रवर्द्धन, बजारीकरण र उपभोगलाई प्रोत्साहन गर्ने लक्ष्य राखेको छ।

सम्मेलनको उद्घाटन गर्दै बूढानीलकण्ठ नगरपालिकाका नगरप्रमुखले नगरभित्र उत्पादित स्थानीय तथा रैथाने कृषि र पशुजन्य उत्पादनको बजारीकरणमा सहयोग पुऱ्याउन यस कार्यक्रमको आयोजना गरिएको बताउनुभयो। उहाँका अनुसार नगर क्षेत्रका कृषकहरूलाई व्यावसायिक बनाउँदै उत्पादन वृद्धि गर्न र उनीहरूका उत्पादनलाई उपभोक्तासम्म सहज रूपमा पुऱ्याउन नगरपालिकाले निरन्तर विभिन्न कार्यक्रमहरू सञ्चालन गर्दै आएको छ।

दुई दिनसम्म सञ्चालन हुने यस प्रदर्शनी मेलामा स्थानीय कृषकहरूले उत्पादन गरेका जैविक तरकारी, फलफूल, दुग्धजन्य तथा पशुजन्य उत्पादनहरूका साथै रैथाने बालीका विविध परिकार र आधुनिक कृषि प्रविधिहरू प्रदर्शनमा राखिएका छन्। मेलाले कृषक र उपभोक्ताबीच प्रत्यक्ष सम्बन्ध स्थापित गराउनुका साथै बिचौलियाको प्रभाव कम गरी कृषकलाई उचित मूल्य दिलाउन महत्त्वपूर्ण योगदान पुऱ्याउने अपेक्षा गरिएको छ।

हाल शहरीकरणका कारण कृषि क्षेत्र ओझेलमा पर्दै गएको परिप्रेक्ष्यमा बूढानीलकण्ठ नगरपालिकाले सञ्चालन गरेको यो अभियानले स्थानीय कृषि प्रणालीलाई जीवित राख्न प्रोत्साहन गर्नेछ। नगरपालिकाले आगामी दिनहरूमा पनि कृषकहरूलाई प्रविधि हस्तान्तरण, अनुदान, बीउबिजन वितरण तथा प्राविधिक परामर्श निरन्तर उपलब्ध गराउने प्रतिबद्धता जनाएको छ। मेलामा स्थानीयवासी, कृषि विज्ञ तथा सरोकारवालाहरूको उत्साहजनक सहभागिता रहेको छ।