वैभव सूर्यवंशी टाइम १०० नेक्स्टको सूचीमा समावेश

२ माघ, काठमाडौं ।

भारतका १५ वर्षीय युवा ब्याटर वैभव सूर्यवंशी अमेरिकी पत्रिका टाइमको प्रतिष्ठित ‘टाइम १०० नेक्स्ट’ को सूचीमा परेका छन्। विश्वभरका उदीयमान १०० प्रतिभालाई समेटेर सार्वजनिक गरिएको यस सूचीमा स्थान बनाउन सफल उनी एकमात्र भारतीय खेलाडी हुन्। सानै उमेरमा क्रिकेटको मैदानमा देखाएको असाधारण खेल कौशल र सम्भावनाका कारण उनी अन्तर्राष्ट्रिय ध्यान आकर्षित गर्न सफल भएका हुन्।

टाइम पत्रिकाले हरेक वर्ष विश्वभर विभिन्न क्षेत्रमा प्रभाव पारिरहेका तथा भविष्य निर्माण गर्ने सम्भावना बोकेका उदीयमान व्यक्तित्वहरूलाई ‘टाइम १०० नेक्स्ट’ सूचीमा स्थान दिँदै आएको छ। यस वर्षको सूचीमा खेलकुद, मनोरञ्जन, राजनीति, व्यापार तथा प्रविधिका क्षेत्रमा उदीयमान रहेका प्रतिभाहरू परेका छन्। वैभवले आफ्नो उत्कृष्ट खेलका माध्यमबाट अन्तर्राष्ट्रिय क्रिकेट जगतमा बनाएको छवि र प्रभावकै कारण यो महत्वपूर्ण सम्मान प्राप्त गरेका हुन्।

घरेलु क्रिकेट तथा उमेर समूहका प्रतियोगिताहरूमा निरन्तर उत्कृष्ट प्रदर्शन गर्दै आएका वैभव सूर्यवंशीलाई भारतीय क्रिकेटको उदीयमान ताराका रूपमा हेरिएको छ। निकै कम उमेरमा प्रथम श्रेणीको क्रिकेट प्रतियोगिता खेल्दै कीर्तिमान बनाएका उनी आफ्नो आक्रामक ब्याटिङ शैलीका लागि चिनिन्छन्। कठिन परिस्थितिमा पनि धैर्यताका साथ रन बनाउन सक्ने क्षमताले गर्दा उनलाई क्रिकेट विश्लेषकहरूले भविष्यका सुपरस्टारका रूपमा मूल्याङ्कन गर्ने गरेका छन्।

अन्तर्राष्ट्रिय मञ्चमा १५ वर्षकै उमेरमा टाइम जस्तो प्रतिष्ठित अमेरिकी पत्रिकाको ध्यान खिच्न सफल हुनु वैभव र समग्र क्रिकेट जगतकै लागि ठूलो उपलब्धि मानिएको छ। टाइम पत्रिकाका अनुसार सूर्यवंशीको खेलमा रहेको निखारता, परिपक्वता र आगामी दिनको सम्भावनालाई मध्यनजर गर्दै उनलाई विश्वका १०० उदीयमान प्रतिभाको सूचीमा समावेश गरिएको हो।

विश्वभरका प्रभावशाली युवा प्रतिभाको सूचीमा नाम दर्ता भएसँगै सूर्यवंशीलाई आगामी दिनमा आफ्नो खेल जीवनलाई थप उचाइमा पुर्‍याउने प्रेरणा मिलेको छ। भारतीय खेलकुद वृत्तका पूर्व खेलाडी, प्रशिक्षक तथा समर्थकहरूले वैभवको यस अन्तर्राष्ट्रिय उपलब्धिलाई लिएर खुसी व्यक्त गर्दै उनको उज्ज्वल भविष्यको कामना गरेका छन्।