देशभरका म्यानपावर कम्पनी आजदेखि बन्द, वैदेशिक रोजगारी ठप्प

१ भदौ, काठमाडौं ।

नेपाल वैदेशिक रोजगार व्यवसायी संघले सरकारसमक्ष राखेका विभिन्न मागहरू सम्बोधन नभएको भन्दै सोमबारदेखि देशभरका सम्पूर्ण म्यानपावर कम्पनीहरूको सेवा पूर्ण रूपमा बन्द गरेका छन्। काठमाडौंस्थित मुख्य कार्यालयसहित देशैभर रहेका व्यवसायीका शाखा कार्यालयहरू बन्द भएपछि वैदेशिक रोजगारीको पर्खाइमा रहेका हजारौँ युवाहरूको प्रक्रिया रोकिएको छ। संघको यो निर्णयसँगै वैदेशिक रोजगारीसँग सम्बन्धित सम्पूर्ण सेवाहरू पूर्ण रूपमा ठप्प बनेका छन्।

संघको पूर्वघोषित आन्दोलनका कार्यक्रमअनुसार नयाँ विज्ञापन प्रकाशन, श्रमिक छनोट, अन्तर्वार्ता तथा रिक्रुटिङका सम्पूर्ण प्रक्रियाहरू रोकिएका हुन्। यसका साथै पूर्व तथा अन्तिम श्रम स्वीकृति लिने काम र भिसा स्ट्याम्पिङसमेत ठप्प पारिएको छ। यसअघि नै श्रम स्वीकृति प्राप्त गरिसकेका श्रमिकहरूलाई उडानमा पठाउन दिइएको समयसीमा समाप्त भइसकेकाले अब भिसा आइसकेका श्रमिकहरूको उडानसमेत रोक्ने निर्णय व्यवसायीहरूले गरेका छन्।

वैदेशिक रोजगार व्यवसायीहरूले व्यवसाय सञ्चालनका नीतिगत झन्झट, धरौटी रकमको व्यवस्थापन, सेवा शुल्क निर्धारण तथा विदेशस्थित नेपाली कूटनीतिक नियोगबाट मागपत्र प्रमाणीकरणमा हुने ढिलाइलगायतका विषयमा लामो समयदेखि सुधारको माग गर्दै आएका थिए। पटक-पटक ध्यानाकर्षण गराउँदा पनि सरकार आफ्ना समस्याप्रति उदासीन बनेपछि बाध्य भएर कडा आन्दोलनमा उत्रनु परेको संघको दाबी छ। यसअघि चरणबद्ध आन्दोलनका कार्यक्रम गर्दै आएको संघले सरकारले ठोस कदम नचालेसम्म व्यवसाय सञ्चालन नगर्ने अडान लिएको छ।

देशभरका म्यानपावर कम्पनी एकसाथ बन्द हुँदा वैदेशिक रोजगारीमा जाने तयारीमा रहेका युवाहरू प्रत्यक्ष मर्कामा परेका छन्। उडानको अन्तिम तयारीमा रहेका र श्रम स्वीकृतिको पर्खाइमा बसेका श्रमिकहरूको भविष्य अन्यौलमा परेको छ। व्यवसायी र सरकारबिच देखिएको यो टकरावले समग्र वैदेशिक रोजगार क्षेत्र अस्तव्यस्त बनेकाले दुवै पक्षबिच तत्काल सकारात्मक वार्ता र सहमति हुनुपर्नेमा जोड दिइएको छ।

यो पनि पढ्नुहोस: विदेशी मुद्राको विनिमय दर सार्वजनिक: डलर र युरोको भाउ कति?, उपत्यकामा दुई दिनमै १६ हजार बढी ग्यास सिलिन्डर वितरण, सोमबारदेखि आपूर्ति सहज हुने निगमको दाबी, सोमबारदेखि म्यानपावर कम्पनीहरू बन्द गर्ने व्यवसायीको चेतावनी, हजारौँ श्रमिक प्रभावित हुने खतरा, संघीय संसद्का दुवै सदनको बैठक आज बस्दै, यस्तो छ कार्यसूची, बन्द अवस्थामा रहेको गोरखकाली रबर उद्योग पुनः सञ्चालन गर्न अध्ययन तथा अनुगमन सुरु, पोखरा र कपिलवस्तुमा प्रहरीको छापा: लागुऔषध र जुवाताससहित ३२ जना पक्राउ, अन्तर्राष्ट्रिय बजारमा उतारचढावका बीच इन्धनको मूल्य यथावत्, आयल निगमलाई १५ दिनमै ८१ करोड बढी घाटा, म्यानचेस्टर सिटीलाई हराउँदै आर्सनलले जित्यो एफए कम्युनिटी शिल्डको उपाधि

पर्यटन प्रबन्धनको लागि tarevir.com,
नागरिक जिम्मेवारीको लागि jimmewari.com,
दक्ष सेवाहरूको लागिskillssewa.com
को सुरुवात गरिएको छ, जसले सेवाको सहज व्यापार र सचेतनाका लागि मञ्च प्रदान गर्नेछन्।